Çin Elm və Texnologiyalar Universitetinin tədqiqatçıları, insanın adi gözlə görə bilmədiyi infraqırmızı diapazonda görməsini mümkün edən kontakt linzalar hazırladıqlarını açıqlayıblar. Gecə görmə cihazlarından fərqli olaraq, bu kontakt linzalar enerji mənbəyinə ehtiyac duymur və onların şəffaflığı həm infraqırmızı işığı, həm də adi görünən işıq spektrini eyni anda qəbul etməyə imkan verir. Bu irəliləyiş insan görmə qabiliyyətini genişləndirə və rəng korluğu olan şəxslərə kömək edə bilər. İnsanların görə bildikləri işıq dalğa uzunluqları elektromaqnit spektrinin cəmi yüzdə birindən də az hissəsini təşkil edir. Alimlər tərəfindən hazırlanmış bu kontakt linzalar, insan görməsini təbii, lakin olduqca dar olan diapazonun hüdudlarından kənara çıxara bilər.

Tədqiqatçılardan birinin sözlərinə görə, Günəş şüalanmasının yarıdan çoxu infraqırmızı işıq şəklindədir və bu, insanlar üçün görünməz olaraq qalır. İnsanlar tərəfindən görünə bilən rənglər spektri 400-dən 700 nanometrə qədər olan dalğa uzunluqlarını əhatə edir. Lakin bir çox digər heyvanlar dünyanı fərqli şəkildə qavrayır. Quşlar, arılar, marallar və siçanlar insanlar üçün çox qısa olan dalğa uzunluqlarına malik ultrabənövşəyi işığı görə bilirlər. Bəzi ilanlar və yarasalarda isə uzaq infraqırmızı və ya istilik şüalanmasını aşkar edən orqanlar var ki, bu da onlara ov etməyə kömək edir. İnsan görmə diapazonunu genişləndirmək məqsədilə alimlər apkonversiya nanohissəcikləri adlandırılan xüsusi hissəciklər hazırlayıblar.

Bu nanohissəciklər infraqırmızı şüalanmanı qəbul edir və onu görünən işığa çevirir. Araşdırma zamanı bu hissəciklər 0.9-dan 1.7 mikrometrə qədər olan yaxın infraqırmızı diapazonundakı dalğaları udaraq, onları görünən qırmızı, yaşıl və ya mavi işığa çevirmişdir. İlk sınaqlarda tədqiqatçılar apkonversiya nanohissəciklərini siçanların gözlərindəki torlu qişanın altına birbaşa yeridirdilər. Lakin bunun insanlar tərəfindən asanlıqla qəbul olunmayacağını nəzərə alaraq, daha az invaziv texnologiya hazırladılar. Alimlər özləri tərəfindən hazırlanmış nanohissəcikləri özlərində birləşdirən yumşaq kontakt linzalar istehsal etdilər. Bu linzalardan istifadə zamanı sınaq iştirakçısı infraqırmızı LED-in yanıb-sönməsini görə və şüa mənbəyinin yerini müəyyən edə bildi.

Maraqlı məqam odur ki, gözlər bağlı olduqda infraqırmızı diapazonun qavranması daha da yaxşılaşırdı, çünki göz qapaqları görünən işığı infraqırmızıya nisbətən daha çox bloklayır. Hazırda alimlər tərəfindən hazırlanmış kontakt linzalar, 3-dən 15 mikrometrə qədər olan dalğa uzunluqlarına malik uzaq infraqırmızı diapazondakı təbii aşağı səviyyəli infraqırmızı işığı qəbul etmək üçün yetərincə həssas deyil. Bu isə o deməkdir ki, onlar hələ istilik görməsini təmin edə bilmir. Lakin tədqiqatçılar ümid edirlər ki, yaxın gələcəkdə materialşünaslar daha yüksək effektivliyə malik nanohissəciklər hazırlaya biləcəklər və bu da kontakt linzaları tam funksional istilik kameralarına çevirəcək. Yeni texnologiya artıq indi daltonizm xəstəliyindən əziyyət çəkən insanlara kömək üçün istifadə oluna bilər. Yəni xəstənin görə bilmədiyi spektr hissəsi görünən işığa çevrilə bilər. Həmçinin, infraqırmızı LED vasitəsilə Mors əlifbası ilə ötürülən mesajları yalnız apkonversiya nanohissəcikli kontakt linza istifadəçiləri görə biləcəklər.